GERTU Enpresa Aholkulariak eta Abokatuak

Langile autonomoak eta langabezia

Pello — Thu, 15 Jul 2010 23:01:55 +0000

Langabezi egoeran aurkitzen diren autonomoen babesa arautzea autonomoek aspalditik egin duten eskaera izan da. 2007.urtean indarrean sartu zen Langile Autonomoen Estatuto-Legean aurkitu genitzake lehen aipamenak, non gobernuak, langile autonomoen elkarte esanguratsuenekin batera eta beti ere sistemaren iraunkortasun eta jasankortasun printzipioetan oinarrituz lege berri bat egiteko kompromezua hartzen zuen bere gain.

Arira, esan, Lege Proiektua onartua izan zela 2010. urteko Otsailean eta badirudi ahalegin guztiak egingo direla 2011. urteko urtarriletik aurrera sistema berria martxan jar dadin.

Hauetxek lirake babes sistema berri honen atalik aipagarrienak:

Behin behineko nahiz behin betiko lanuzte egoeran dauden autonomoek izango dute babesa.

Nortzuk dira hauek?

Arrazoi ekonomikoak direla eta lana utzi dutenak (baldintza, azken urtean, sarreren %40a baino gehiagoko galerak izatea da edota %30 eko galerak azken bi urtetan).
Indarrez aktibitatea utzi behar izan dutenak.
Baimen administratiboa galtzeagatik lana utzi dutenak.
Genero indarkeriagatik lan autonomoa utzi dutenak
Dibortzioagatik bere bikotearen autonomo laguntzaile izaera galdu dutenak.

Kasuan kasu, legeak zein dokumentuen bidez adierazi daiteken egoera bakoitza arautu du.

Ze babes jasoko dute?

Alde batetik laguntza ekonomikoa eta bestetik gizarte segurantzara kotizazioak enplegu erakundearen gain izango direlarik hauek.

Baldintzak

Gizarte asegurantzan altan egotea.
Lehenago aipaturiko lanuzte egoeraren batean aurkitzea.
Gutxiengo kotizazio epea beteta edukitzea.
Gizarte segurantzako ordainketetan egunean egotea.

Ordainketei dagokienez, autonomoetako oinarriaren % 1.5–a ordainduko da langabezi egoeran babesagatik.

Iraupena eta zenbatekoa.

Langabeziaren babeserako kotizatutako epeen araberako iraupena izango du laguntzak: 12 hilabetetan kotizatu beharko da gutxienez 2 hilabetetako langabezi eskubidea izateko eta 6 hilabetez jaso ahal izango da gehienez, honetarako 25 hilabete edo gehiagoko kotizazioak bildu beharko direlarik.

Laguntzaren zenbatekoari dagokionez. Oinarri erregulatzailearen ( azken 12 hilabatetako kotizazio oinarrien media) % 70-a kobratuko da laguntzak dirauen bitartean. ( gehienez esan bezala 6 hilabete). 60-64 urte bitarteko autonomoek, arau bereziak izango dituzte, gehinez 9 hilabete eta gutxienes 3 kobratuko dituztelarik).

Langile autonomoen eskubideen babesean aurrerapauso bat dugu lege proiektu hau dudarik gabe. Hala eta guztiz ere indarrean sartu aurretik arauaren kontrako lehen ahotsak ere entzun dira, ara nola, besteren kontura lan egiten duten langileak langabezi egoeran daudela azaltzeko dituzten baldintzekin alderatuz askoz gogorragoak dirala autonomoen kasuan, gehinez 6 hilabete kobratu daitezkela, besteren kontura lanean ari direnek 24 hilabetetako langabezi laguntza dutenean…

Mugak-muga, autonomoen babes-sistemak erronka garrantzitsu bat du bere aurrean. Sistemaren arrakasta, autonomoek era bolondresean sistemara atxikitzen diren edo ezean ikusiko da.

Emekin: emakume eta enpresari

Idoia — Fri, 25 Sep 2009 10:00:04 +0000

Azken aldi honetan lan mundutik iristen zaizkigun berriak ez dira batere baikorrak: Kaleratze masiboak, desenpleguaren hazkuntza, erregulazio expedienteak, etab. Egoera ekonomiko ezkor honen aurrean erabakiak hartzeko momentua dela uste dute askok eta garbi dago arazo honen aurrean norbere kontura enpresa sortzea aukeratako bat izan daitekeela. Emakumezkoen artean, gizonezkoek sorturiko enpresak ugari badira ere, nabarmen hazi da beren kontura lan egiten dutenen kopurua.

Frogatua dago beraz emakumeek ekimenerako geroz eta joera handiagoa dutela eta beren kontura lan egiteak hainbat abantaila ere ematen dizkiela (ordutegi malguagoak, kontziliaziorako aukerak, garapen pertsonala…).

Oro har ordea, ekintzaile batek jarduera bat martxan jarri nahi duenean aurkitzen duen zailtasunik nabarmenena, finantzazioa edo diru iturria lortzean datza. Honi aurre egiteko, administrazio publiko desberdinek hainbat diru-laguntza kudeatzen dituzten programak jarri dituzte martxan. Helburu bera dute denek: emakumearen auto-enplegurako ekimena sustatzea eta enpresari alorrean sartzeko bidea erraztea.

Hauen artean aipamen berezia merezi du Gipuzkoako Foru Aldundiak, ASPEGI-k eta Euskadiko Kutxak elkarlanean martxan jarri duten Emekin programak. Programa honek enpresa bat bere kontura sortzeko ideia duten edozein adinetako emakumeei laguntzea du helburu. Programaren barnean eskaintzen diren zerbitzuetatik garrantzitsuenak hauek lirateke:

Enpresa-jarrerei buruzko tailerra.
Bideragarritsun proiektuaren tutoretza
Finantzazioa lortzeko aukera (abala zenbait kasutan)
Enpresa martxan jarrita urtebeteko aholkularitza
Lana eta familia bateragarri egiteko neurriak

Zerbitzu guzti hauek, Foru Aldundiak ekimenerako homologatuak dituen erakundeen bidez eskaintzen dira eta guztiz dohakoak dira.

Lehen aipatutakoaren harira, badira laguntza honez gain baste batzuk ere:

Eusko jaurlaritzak ematen duen 6.000 €-ko laguntza, horretarako eskatutako baldintzak betetzen badira.
Langabeziaren kapitalizazioa.
Inem erakundeak eskaintzen dituen laguntzak bai inbertsioen finantzaketarako baita maileguen amortizazioan laguntzeko ere.
Sektorez-sektoreko laguntzak: ( Artisautza, proiektu berritzaileak…)

Dudarik gabe, norberaren proiektuan sinestea, etengabeko lana eta zorte dosi apur bat beharrezkoak badira ere, ongi etorriak izango dira edonondik eskaintzen zaizkigun laguntzak .

Idoia Oyarbide Nazabal

Autoenplegu eta Enpresa-Kudeaketarako ikastaro berria emango du GERTUk

Alain — Thu, 17 Sep 2009 14:31:46 +0000

Gertu Enpresa Aholkulariek eta Abokatuek, Daiteke, pertsonen orientazio eta gaitasunen garapena bultzatzen duen entitatearekin batera, enpresa baten sorreraren eta kudeaketaren inguruko ikastaroa antolatuko dute Donostian, Urdaneta Kaleko 18an duten bulego berrian, irailaren 21etik 28ra.

Ikastaro hau Eusko Jaurlaritzak homologatua izango da eta guztiz doakoa da parte hartzea. Ikastaro honek, 6.000 euroko diru-laguntza eskatzeko ateak zabaltzen ditu, enpresa martxan jarri eta beste zenbait baldintza betetzen diren kasuan beti ere (langabezian egotea, bideragarria den proiektu bat izatea etab).

Kurtso hau enpresa sortu nahi duen pertsona orori zuzendua dago, buruan ideia bat duen edonori zuzendua, alegia. Martxan jarri nahi den jardueraren inguruko informazio guztia jasoko da astebeteko iraupena duen kurtso honetan (betebeharrak, tramiteak, dirulaguntzak, finantziazioa…).

Esan dugun moduan, prestakuntza honetan zehar enpresa baten sorrera eta kudeaketaren inguruko informazio guztia jasoko da ( naiz autonomo erako enpresa sortu nahi izan naiz elkarte edo sozietate itxurakoa sortu). Zehatzago azalduz, honako gai hauek jorratuko dira:

Bideragarritasun plan baten atal desberdinen azterketa.
Merkatu analisi bat nola burutu.
Marketineko politika ezberdinak
Analisi ekonomiko baten inguruko informazioa
Enpresa baten izaera juridiko motak eta bakoitzaren ezaugarriak
Enpresa martxan jartzeko eman beharreko urratsak
Autoenplegua bultzatzeko dauden programa eta diru-laguntzak.
Enpresaren barne antolaketa
Lan arloko aukera berdintasuna
Lan arriskuen prebentzioa
Ingurumenaren kudeaketa.

Ikastaroan metodologia bikoitza erabiliko da, alde batetik atal teorikoa landuko da enpresa gestioaren inguruko kontzeptu ezberdinak ulertu eta barneratzeko xedearekin eta bestetik, kasu praktikoak proposatuko dira azaldutako gai teorikoak errealitatean nola diren ulertu ahal izateko.

Ikastaro hauez gain, Gertu Enpresa Aholkulari eta Abokatuak, behin kurtsoa amaitu ondoren, Bideragarritasun Proiektua egiteko aukera ere luzatuko die kurtsoan parte hartu duten ikasleei. Honetarako, Gertu edo Daitekeko arduradunekin harremanetan jartzea besterik ez du ikasleak, zerbitzu hau ere guztiz doakoa delarik.

Jabego-erregistroa eta katastroa

Monica — Fri, 04 Sep 2009 08:00:01 +0000

Batzuetan gertatzen zaigu uste dugula finka jakin baten jabe garela katastroan gure izenean dagoelako, edo zenbaitetan uste izaten dugu finka jakin bat Jabego Erregistroan ez dagoenean berez ez garela haren jabe. Zein da Erregistroaren helburua, eta zertarako balio du Katastroak?

Erregistroak ondasun higiezinen gaineko jabetza zein hauen gaineko eskubideak inskribatzeko eta hauei publizitatea emateko balio du. Ez da derrigorrezkoa finkaren gaineko jabetza inskribatzea haren jabe izateko, baina segurtasun juridikoa lortzen da, behin inskribatuta, eskubideak Auzitegien babespean aurkitzen dira, eta Erregistroak dioena soilik hartzen da egiatzat. Gainera finkak dagokien erregistroan inskribatzeak euren transmisioa errazten du, eta derrigorrezkoa da horiek hipotekatu nahi badira.

Katastroan ondasun higiezinak deskribatzen dira, euren ezaugarrien bitartez: ezaugarri fisikoak (azalera, egoera eta mugak, irudi grafikoa, eraikitze-urtea, besteak beste), ezaugarri juridikoak (titularraren datu pertsonalak / expedienteak), eta ezaugarri ekonomikoak (lur-zoruaren balioa, eraikinaren balioa eta balio katastrala). Bere erabilera oinarrizkoa da Administrazioarentzaeko, hainbat gaietan erabili ahal izateko: zerga-gaietan (PFEZaren kalkulua, lur-zoruen plusbalia…), gai juridikoetan (Jabego Erregistroaren laguntza, segurtasuna higiezinen trafikoari…), laguntza zein subentzioen esleipena, eta abar.

Jabego Erregistroan finkak deskribatzen dira, baina benetan garrantzia duena da jabegoaren zein bestelako eskubideen gaineko datuak ematen dizkigula. Katastroan, aldiz, jabe batzuk agertzen dira, baina benetan garrantzia duena da finken deskribapen fisikoa, hauen ezaugarri fisikoen zein planoen erregistroa da, hau oinarrizkoa baita euren balioa kalkulatu eta identifikatuak edukitzeko.

Donostiko bulego berriaren inaugurazioa

Daniel — Tue, 09 Jun 2009 18:30:00 +0000

Pasa den ostiralean GERTUren Donostiko bulego berria inauguratu genuen. Esaten genizuen bezala, bulego honek instalakuntza hobeak ditu, zabalagoak zein irisgarriagoak. Aurrera, ikus ezazue zeuon begiekin.

: Bulegoko sarrera

: Lan giro irekia eta atsegina sortzen saiatu gara

: Zu gu bezain eroso sentitzea espero dugu

: Lantoki on bat

: Orain leku gehiago izango dugu

: Zu erosotasunez atenditzeko aukera emango digun bilera-gela

: Inauguraziorako profesionalen laguntza izan genuen

: Formakuntza-gelaren sarreran

: Ez dadila aurrekaritzat hartu, baina formakuntza-gela ospakizun-lekutzat hartu genuen

: Giroa lasaia eta alaia izan zen

: Hainbatek lanaz besterik ez zuten hitz egin

: Mónica eta Idoia, abokatuak

GERTUk Donostiko bulegoa Urdaneta 18ra aldatuko du

Daniel — Wed, 27 May 2009 18:30:00 +0000

Ostiral honetan GERTUk Donostiko bulegoa Boulevardetik Urdaneta kalera aldatuko du. Kale-izenak buruz gogoratzea gorroto duzuenontzako, erreferentzia gisa ondo etorriko zaizue jakitea Koldo Mitxelena eta Correosen bulego zentralaren kale berean egongo garela, Artzai Onaren Katedralaren ondoan.

Lekualdaketa honen bitartez GERTUk lortu nahi duena da bere bezeroei zerbitzu hobea eskaintzea, bere eskura instalakuntza hobeak jarriaz, zabalagoak zein irisgarriagoak. Eta ez gatoz bakarrik, Daitekek lagunduta gatoz, honela lotzen gaituen urtetako lankidetza-harremana egonkortuz.

Nahi duzunean gure bulegoak ezagutzera pasa zaitezen gonbidatzen zaitugu. Autobusez gerturatu zaitezke (Artzai Onetik honako lineak pasatzen dira: 5, 16, 18, 25 eta 40), edo trenez. Kotxez etorten bazara, Artzai Onaren parking-ean aparkatu ahal izango duzu.

“Enpresa berrien sorrera eta Gestioa” ikastaroa

Idoia — Wed, 08 Apr 2009 14:55:28 +0000

Maiatzaren 11tik 22ra GERTUk kurtsoa antolatuko du, dohainekoa, “Enpresa berrien sorrera eta Gestioa” izenburupean. Kurtso honen helburua da ekintzaile batek enpresa martxan jartzeko eman beharreko pausuak zein diren azaltzea, eta sortuko duen enpresaren gestioaren puntu garrantzitsuenen inguruko formazio basikoa lortzea.

Eusko Jaurlaritzak homologatua

GERTU ENPRESA AHOLKULARIAK ETA ABOKATUAK, S.L. enpresak, 2005. urteko uztailean Eusko Jaurlaritzaren Homologazio prozesua pasatu ondoren kurtso hau eman ahal izateko kalifikazioa lortu zuen.

Eusko Jaurlaritzaren Homologazioak zer nahi du esan ordea? Ba , aurrerantzean, GERTU enpresak antolatzen dituen ikastaroak, subentzionatuak izango direla (ekintzaile edo promotorearentzat dohakoak) eta hau baino are garrantzitsuagoa , kurtso hau egin eta gainerako baldintzak betetzen dituzten proiektuek 6.000 eurotako laguntza izango dutela proiektu horretako promotore bakoitzeko.

Formakuntza baino zerbait gehiago

Gertu Enpresa Aholkulariak eta Abokatuak S.L. enpresak formakuntza honetaz gain ondorengo bideragarritasun plana egiten lagunduko die ekintzaileei. Proiektu hauetan negozio berriaren aurrikuspenak egingo dira eta diru laguntza eta finantziazioa bilatzen lagunduko zaie ekintzaileei.

Guzti honen ondoren eta behin enpresa martxan jarri ondoren, dohako aholkularitza eskainiko zaie 25 orduz.

Era honetan, Gertuk ziklo osoa betetzen du, hain zuzen formazio, bideragarritasun plana eta ondorengo aholkularitza bateratuari dagokiona. Garrantzizkoa da gure ustez ziklo oso hau profesional berdinen eskuetan eta irizpide berdinak jarraituz egitea.

Kurtsoan parte hartzeko bete beharreko baldintzak

Kurtso honetan parte hartzeko bete beharreko baldintzak:

Langabezian egotea
Ideaiaren baten bueltan ibiltzea

Ez dago adin edo beste baldintza aldetik inongo mugarik.

LABURKI:

IZENBURUA:”ENPRESA BERRIEN SORRERA ETA GESTIOA”
NON: GERTU ENPRESA AHOLKULARIAK ETA ABOKATUAK S.L.
HELBIDEA: SAN INAZIO 5 BEHEA ( BEASAIN )
NOIZ: MAITZAK 11TIK 22RA
ORDUTEGIA: 9:30 ETIK 13:30 TARA.
INFORMAZIO GEHIAGO: 943-16.21.92 – 943-16.11.94
METODOLOGÍA : PRAKTIKO-TEORIKOA

PLAZA MUGATUAK

Dibortziatua nago, nork ordaindu behar du orain dentista? Eta musika-eskola

Monica — Fri, 16 Jan 2009 09:00:22 +0000

Banantze zein dibortzio baten ostean despatxuan ohizkoa den galdera bati erantzuna ematen saiatuko naiz hurrengo lerroetan: umearen gastuetatik, zeintzuk izango dira mantenu-pentsioaren kontura, eta zeintzuk erdibana ordaindu beharreko ez-ohizko gastuak?

Hain gai interesgarriari buruzko epai mordoa aztertuta esan genezake zenbaitetan epaile ezberdinen ebazpenen artean alde nabaria egon daitekeela, baina hala ere hainbat ondorio atera daitezke:

Ez-ohizko gastuak dira mantenu-pentsioa ezartzerakoan (bai epaileak zehaztuta bai ezkontide ohiek Hitzarmenean adostasunez jasotakoa) aurreikusi ez diren gastuak. Beraz garrantzitsua da gastuen ez-ohizkotasuna zehazteko horiek sortutako unea aztertzea, zein den pentsioa ezartzeko momentuaren egoera.

Adibidez, mantenu-pentsioa ezartzean umea iada musika-eskolara joaten bada, gastu hori kontutan hartua izango da pentsioa ezartzean, eta beraz ohizko gastua izango da, mantenu-pentsioaren bitartez ordaindu beharrekoa. Eskolaz kanpoko ihardueraren bat hasi behar badu, adibidez, pentsioa ezarri zenetik bi urtetara, orduan ez-ohizko gastua izango da, ezin zelako aurreikusi zerbait berria den heinean.

Eta orduan, ez-ohizko gastua bada, erdibana ordaindu behar al da beti, %50ean? Erantzuna ez-ohizko gastu horren beharrezkotasunaren araberakoa izango da. Adibidez, umeari hortzetako aparailua jartzen bazaio, beharrezkoa izanik eta Gizarte Segurantzak hura kubritzen ez duelarik, erdibana ordaindu beharrekoa izango da. Beharrezkoa ez den gastu baten kasuan, adibidez, ludotekaren kuota, bi gurasoak ados egon beharko dira, haietako bat ados ez dagoenean ezin zaiolako ordainketa galdatu.

Ikus dezakegunez, eskolaz kanpoko iharduerak ez dira beti ez-ohizko gastutzat jotzen, eta beraz ez dira beti erdibana ordainduko. Kontzeptu bakoitzarentzako azterketa egin beharko da, eta familia bakoitzaren testuinguruan, honakoa zehaztu beharko da:

Denbora. Mantenu-pentsioa ezartzeko unearen egoera.
Aurrikusgarritasuna. Ea momentu horretan gastua aurrikusgarria zen edo ez.
Beharrezkotasuna. Gastua beharrezkoa zen edo ez.

Mantenu-pentsioaren igoera zein egoeratan eskatu dezakegun hurrengo artikulu batean azalduko dut.

2007ko errenta-aitorpenaren kanpaina

Idoia — Tue, 25 Mar 2008 08:00:13 +0000

Urtero bezala, errenta aitorpena egiteko garaia iritsi da. Aurtengoan, Gipuzkoan aitorpenaren epea apirilaren 18an irekiko da, eta ekainaren 25era bitarte luzatuko da.

Nork aurkeztu behar du 2007. urteko aitorpena?

Orokorrean, Zergari atxikita dauden errentak jaso dituen pertsonak: etekinak, errenta egotziak edo ondare irabazi eta galerak lortu dituzten zergadunak.

Aurkezpena ez da derrigorrezkoa izango bi baldintza hauek betetzen badira:

20.000 euro gordineko soldataren azpitik egotea.
Kapitalaren etekin gordinak eta ondare irabaziak batera hartuta, urtean 1.600 euro baino gutxiago lortu izana

Nahiz eta aurreko bi baldintza hauek bete, 9.000 eta 20.000 euro bitarteko lan etekinak izan eta ondorengo egoeratako batean dagoenak, errenta aitorpena aurkeztu beharko du:

Ordaintzaile bat baino gehiago izan dituenak.
Kontratu bat baino gehiago sinatu dituenak.
Epaileen erabakiz pentsio konpensagarriak jaso dituenak
Atxikipenak kanpoko araudiaren arabera kalkulatu zaizkionak.
Egunsariak jaso dituenak.
Arrantzuntzietako langileek, ordainsariak arrantzaren balioaren partaidetza bat direnean.
Ordainsari aldakorrak atxikipen portzentaia kalkulatzeko kontuan hartutakoak baino handiagoak direnean.

Egoera honetan daudenak bi aukera dituzte:

Aitorpen orokorra egitea.
Hautazko likidazioa egitea., hau da, lan etekinak bakarrik kontutan hartuaz.

Nahiz eta aitorpena egitera beharturik ez egon, atxiki edo norberaren kontura sartu diren kantitateak berreskuratu nahi dituen zergadun orok aurkeztu dezakete aitorpena.

Zein dira 2007 ekitaldiko ezaugarri nagusiak?

Salbuetsiak daude errenta hauek:

Gizarte Segurantzak edo honen ordezko entitateek 55 urtetik gorako zergadunen alde aitortutako prestazioak. Jasotzeko arrazoiak: kualifikatutako ezintasun iraunkor osoa, erabateko ezintasun iraunkorra edo baliaezintasun handia.
Langabezi prestazioa, ordainketa bakarreko modalitatean denean bakarrik.
Zurztasun pentsioak eta prestazio familiarrak.

Murrizpenak, mutualitate, pentsio plan eta BGA/EPSV-etara egindako ekarpenagatik

Muga orokorrak:

Enpresaren kontribuzioa: : 8.000 €
Zergadunaren ekarpenak: 8.000 €

Muga bereziak 52 urtetik gorakoek eginiko ekarpenentzako, ezkontidearen edo izatezko bikote-lagunaren alde egindakoentzako eta minusbaliatuen alde ekarpenentzako.

Errenta aitorpen bateratua egiteagatik, 3.800 eurokoa da murrizpen orokorra eta 3.300 eurotakoa guraso bakarreko familientzat.
Kenkariak:

Kenkari orokor berri bat dago 1.250 eurotakoa autolikidazio bakoitzeko egingo delarik.
Kenkari pertsonal eta familiarretan 2006. urtekoak mantentzen dira bakoitzaren kopuruak igoz.
Ezgaituaren ondare babestuari egindako ekarpenengatik kenkari berri bat dago
Ohizko etxebizitzan inbertitzeagatik, kreditu fiskala 36.000 eurokoa izango da zergadun bakoitzeko, eta inbertsioaren eta interesen %18a kendu ahal izango da, urteko muga 2.160 eurokoa izango delarik.

Kenkari hauek zerrenda luzea osatu arren, askorentzat ez dira nahikoa izaten errentaren emaitza nahi bezelakoa izateko.

Lokalak biziberritzen: etxebizitzaren arazoarentzako konponbidetako bat

Daniel — Fri, 09 Nov 2007 17:39:32 +0000

Etxebizitzen merkatuaren aztoramenduaren aurrean, entitate publikoek neurri berriak hartzeko beharra somatu dute, Babes Ofizialeko Etxebizitzen (VPO) formula tradizionala ez baita nahikoa hiritarron etxebizitza duinerako eskubidea bermatzeko, eta neurri horietako bat dugu lokal komertzialak etxebizitza bezala egokitzeko baimenak ematea. Honekin lortu nahi dena da etxebizitza merkeen eskaintza igotzea, eta bidebatez denbora luzean itxiak egon diren lokal komertzialei zeregin sozial bat esleitzea.

Geroz eta gehiago dira gai honen inguruan araudia onartu duten udalak, edo hura prestatzen dabiltzanak. Herri bakoitzak bere araudi propioa izan arren, guztiek amankomunean dutena da honelako baimenei bi baldintza nagusi ezartzen zaizkiela, ezinbestekoak eman nahi izan zaien helburua beteko badute:

Lokalaren ezaugarri fisikoek bertan etxebizitza duina antolatu ahal izango dela bermatzea.
Lokalaren egokitzapena etxebizitzen beharrari aurre egiteko burutzea, eta ez inolako interes espekulatiboengatik.

Lehenengo baldintza betetzeko helburuarekin, ordenantzek lokalen gutxieneko ezaugarri fisikoak jasotzen dituzte, hala nola gutxieneko azalera, argitasuna…

Bigarrena bermatzearren, halako erabilera-aldaketarako baimena jasotzen duten lokalentzako Babes Ofizialeko Etxebizitzen antzeko eraentza aurrikusten da, bi neurri nagusi ezarriaz hura saltzen den kasurako:

Salneurri tasatua ezarriko da, ezingo delarik honen gainetik saldu.
Udalak lehentasunez erosteko eskubidea izango du lokalaren zein egokitutako etxebizitzaren gain.

Araudi hauek etxebizitzen merkatuan zein hauen prezioen gorabeheretan izan dezaketen eragina ikusteko dago. Bitartean, Beasain, Urretxu edo Zaldibia bezalako udaletan martxan jarri berri diren neurri hauek inguruko beste zenbait herritara zabaltzekotan leudeke, inguruko hainbat udal antzeko araudia onartuko dutenentz planteatzen ari baitira.